Igice cya mbere cy’umukino wa gicuti wahuje Kigali FC na Gorilla FC cyarangiye amakipe yombi anganya 0-0, mu gihe umubare muto w’abafana witabiriye uyu mukino wongeye gutuma hibazwa icyakorwa kugira ngo abafana bagaruke ku bibuga.
Uyu mukino witabiriwe n’abayobozi b’amakipe yombi, barimo Perezida wa Gorilla FC, Hadji Mudaheranwa, ndetse na Visi Perezida wa Kigali FC, Uwimana Clarisse, na CEO w’iyi kipe, Bayingana Innocent.
Nubwo ari umukino wa gicuti, kuba waritabiriwe n’abayobozi b’amakipe byagaragaje ko hari ubushake bwo gukomeza guteza imbere aya makipe no kubaka umupira w’amaguru ufite abafana benshi.
Gusa, ikibazo cy’umubare muto w’abafana ku bibuga gikomeje kugarukwaho. Abakunzi b’umupira w’amaguru bakomeje kwibaza impamvu ibibuga byinshi bititabirwa n’abafana ku rwego rwifuzwa, uretse igihe amakipe afite abafana benshi cyane, cyane cyane Rayon Sports, akinnye.
Ese amakipe ntakwiye gushaka abafana bayo?
Kuba abafana ari bake ku mukino wa Kigali FC na Gorilla FC byongeye gutuma hibazwa niba amakipe adakwiye gushyira imbaraga mu bukangurambaga bwo kwegera abafana no kubashishikariza kujya ku bibuga.
Kigali FC, nk’ikipe ihagarariye umujyi wa Kigali, ni imwe mu makipe akwiye kugira umubare munini w’abafana bayishyigikira. Abasesenguzi b’umupira w’amaguru bavuga ko impinduka mu buyobozi bw’ikipe zikwiye kujyana n’ingamba nshya zo kongera umubare w’abafana no kubaka umubano ukomeye hagati y’ikipe n’abayishyigikira.
Abafana ni igice cy’ingenzi mu iterambere ry’ikipe, kuko batanga imbaraga ku bakinnyi, bakongera ubwitabire ku bibuga ndetse bakanagira uruhare mu bikorwa by’ubucuruzi bifasha amakipe kubona amikoro.
Kigali FC n’andi makipe rero arasabwa gutekereza ku buryo bushya bwo gukurura abafana, burimo kubegera mu bice bitandukanye by’umujyi, gukoresha imbuga nkoranyambaga mu bukangurambaga, gutegura ibikorwa bihuriza hamwe ikipe n’abafana ndetse no kubaka umuco wo kujya ku kibuga buri gihe.
Ikibazo gikomeje kwibazwa ni kimwe: ese abafana bazakomeza kugaragara ku bibuga ari uko Rayon Sports cyangwa andi makipe afite abafana benshi ari yo yakinnye, cyangwa amakipe nka Kigali FC azashyiraho ingamba zihariye zo kongera no kuzamura urwego rw’imifanire yayo?
Igisubizo kizashingira ku buryo amakipe azegera abafana no kubereka ko umupira w’amaguru udakwiye gukundwa gusa iyo amakipe akomeye ahuye, ahubwo ko buri kipe ikwiye kugira abafana bayo bayiherekeza mu bihe byose.
@Rebero.rw
About The Author
