Rusizi: Itorero EMLR Conference ya Kinyaga ryatanze amabati 100 yo kubakira abarokotse Jenoside bafite ibibazo by’amacumbi

Mu kwibuka ku nshuro ya 32 abari abayoboke b’itorero EMLR, conference ya Kinyaga bazize Jenoside yakorewe Abatutsi, iyi Conference yageneye Akarere ka Rusizi amabati 100 y’agaciro k’amafaranga 1.200.000 yo kubakira abarokotse bafite ibibazo by’amacumbi, Surintendant w’iyi Conference, Rèv. Past Hakizimana Félicien yizeza ubuyobozi bw’aka Karere ko abakirisito ayoboye batazahwema gufata mu mugongo bagenzi babo barokotse batishoboye.

Byabanjirijwe no kujya kunamira Abatutsi 1015 bashyinguye mu rwibutso rwa Jenoside rwa Kamembe, basobanurirwa amateka y’urwo abarushyinguyemo bishwe, barimo abiciwe urw’agashinyaguro ahitwa mu Gatandara, bamwe abicanyi bakabakuramo bimwe mu bice by’imibiri bakabyotsa,bakabirya.

Ntaganira Josué Michel watanze ikiganiro cyo kwibuka, yagaragaje impamvu kwibuka ari ngombwa,ko uwibuka aba aha agaciro abazize Jenoside yakorewe Abatutsi na we ubwe akiha.

Ntaganira Josué Michel watanze ikiganiro cyo kwibuka

Ati” Mu myitwarire yacu ya buri munsi tugomba guhora tuzirikana Jenoside yakorewe Abatutsi no kwirinda ko yazasubira ukundi. Ayo mateka yacu tugomba kuyumva kimwe ngo twubake u Rwanda ruzima.”

Yavuze ko nubwo Jenoside yakozwe n’abanyarwanda,bayikorera abandi banyarwanda, yanahagaritswe n’abandi banyarwanda bari bafite umutima wo gukunda igihugu, barangajwe imbere na perezida Kagame wanaciye iteka ko Jenoside itazasubira ukundi mu Rwanda.

Mu buhamya bwe, Ntibaziyaremye François wari ufite imyaka 21 muri Jenoside yavuze ko itotezwa ry’Abatutsi muri Kamembe ryatangiranye n’urugamba rwo kubohora igihugu mu 1990, bamwe bafungirwa ubusa ngo ni ibyitso.
Mu myaka yakurikiyeho mu mashyaka menshi, Abatutsi baratotejwe cyane ngo ni inyenzi, abacuruzi bamwe birirwa mu nama z’amashyaka yateguraga kuzica Abatutsi.

Bari ku rwibutso rwa Kamembe

Yagarutse ku barundi bazanywe I Nyarushishi nyuma y’urupfu rwa perezida Ndadaye,biswe ko ari impunzi ariko mu by’ukuri ari abari bahazanywe kuhatorezwa kuzatsemba Abatutsi bakaba baranagize uruhare rukomeye cyane muri Jenoside, yifuza ko bazabazwa.

Ati” Impunzi z’abarundi ziri mu batwishe cyane.”

Yavuze ko Jenoside yamutwaye benshi mu muryango we, agaya uwari perefe w’iyari Perefegitura ya Cyangugu, Emmanuel Bagambiki wagize uruhare mu iyicwa ry’Abatutsi batagira ingano, akababazwa no kumva ko yagizwe umwere n’urukiko mpuzamahanga mpanabyaha rwa Arusha.

Avuga ko yakuwe muri Sitade ya Rusizi yitwaga Kamarampaka icyo gihe,hamwe na bagenzi be bari bataricwa, bajyanwa mu nkambi ya Nyarushishi, bamwe muri bo bayigwamo, abo Inkotanyi zasanze ari bazima babaho.

Yashimiye itorero EMLR Conference ya Kinyaga guhora hafi abarokotse haba mu kubasengera, kubaremera no kubahumuriza mu bundi buryo bwose bushoboka.

Abakirisito basabwe guhora barangwa n’urukundo

Ati” Ndashimira itorero EMLR, Conference ya Kinyaga iki gikorwa cyo guha agaciro abacu bishwe, n’ibikorwa igira byo gufata mu mugongo no guhumuriza abarokotse.”

Yanashimiye byimazeyo Perezida Kagame wayoboye urugamba rwo kubohora igihugu, akagarura umutekano, abarokotse bagahumurizwa.

Yasabye abafite amakuru y’ahakiri imibiri itarashyingurwa mu cyubahiro kuyatanga ngo na yo ishyingurwe mu cyubahiro.

Ati” Dufite benshi twabuze ngo tubashyingure mu cyubahiro. Abafite ayo makuru bayaduha tukabashakisha tukabashyingura mu cyubahiro.”

Komiseri muri Ibuka mu Karere ka Rusizi, Niyonsaba Félix, yibukije abakiri bato ko Inkotanyi ari ubuzima, agaya abasengaga bijanditse muri Jenoside, bakica abo basenganaga, avuga ko kwibuka miliyoni irenga y’Abatutsi bishwe muri Jenoside atari umuhango.

Komiseri muri Ibuka mu Karere ka Rusizi, Niyonsaba Félix ashimira itorero EMLR Conference ya Kinyaga uburyo ryita ku barokotse batishoboye

Ati” Kwibuka si umuhango ahubwo ni igihango dufitanye n’abacu barenga miliyoni bishwe bazira uko bavutse.”

Na we yashimiye itorero EMLR Conference ya Kinyaga imbaraga rishyira mu guhumuriza no gufata mu mugongo abarokotse, rikanashyiraho umunsi wo kwibuka,nk’uburyo bwiza bwo komora ibikomere abarokotse.

Mu izina ry’ubuyobozi bw’Akarere ka Rusizi, Umunyamabanga Nshingwabikorwa w’Umurenge wa Kamembe, Ingabire Joyeux, aganira na Rebero.rw, yagarutse kuri aya mabati 100 iyi Conference yageneye abarokotse bakeneye kubakirwa, ko ari igikorwa cy’ingirakamaro cyane, ubuyobozi buha agaciro gakomeye.

Ati” Byadushimishije cyane, bafatanije n’igihugu gufata mu mugongo abarokotse bafite ibibazo by’amacumbi bababonera aho baba.”

Umunyamabanga Nshingwabikorwa w’Umurenge wa Kamembe, Ingabire Joyeux yavuze ko amabati 100 iyi Conference yageneye abarokotse ari igikorwa cy’agaciro gakomeye cyane

Yavuze ko impamvu igikorwa nk’iki ubuyobozi bw’Umurenge n’Akarere bugiha agaciro cyane ari uko hari benshi bakeneye kubakirwa,aho uyu Murenge wonyine ufite abagera kuri 69, umuganda nk’uyu ukaba ari ingenzi cyane.

Surintendant wa Conference ya Kinyaga, Rév.past. Hakizimana Felicien, yashimiye abakirisito bayo Uburyo bumva neza Kwibuka Jenoside yakorewe Abatutsi, bakanaha agaciro gakomeye cyane igikorwa cyo kuremera abarokotse, ari muri urwo rwego bakusanyije ubushobozi bakishakamo ariya mabati 100.

Ati” Turabasaba gukomeza uwo mutima mwiza,atari mu kwibuka gusa, tukabera andi madini n’amatorero urugero, dukundana, twirinda ingengabitekerezo ya Jenoside, abakirisito bakabaho bishimiye.”

Yashimiye cyane umwepisikopi wa EMLR akanaba umuyobozi w’inama y’ikirenga y’itorero Méthodiste Libre ku isi, Samuel Kayinamura, uburyo ayoboye iri torero n’umurongo yashyizeho wo kwibuka utuma ibi byose bishoboka.

Bacana urumuri rw’icyizere

Ati” Yaduhaye umurongo uhamye w’imiyoborere turamushimira cyane ”

Yanashimiye ubuyobozi bw’Akarere ka Rusizi uburyo buhora hafi iyi Conference mu byo ibukeneraho byose mu bufatanye bwiza busanzwe bubaranga,ashimira ariko cyane umukuru w’igihugu, Paul Kagame, wahagaritse Jenoside, umutekano usesuye yahaye igihugu ukaba ari wo utuma kwibuka n’uku gufata mu mugongo abarokotse bitagira inkomyi.

Conference ya Kinyaga yabayeho nyuma ya Jenoside yakorewe Abatutsi.Ifite abakirisito barenga 27.000 basengera muri paruwasi 19. Surintendant wayo, Rév.past. Hakizimana Felicien avuga ko bagikora ubushakashatsi ngo hamenyekane umubare nyawo w’abari abayoboke ba paruwasi z’iri torero zabyaye iyi Conference bazize Jenoside yakorewe Abatutsi.

Abayobozi bifatanije na Conference ya Kinyaga Kwibuka

Surintendant wa Conference ya Kinyaga, Rév.past. Hakizimana Felicien ashimira umwepisikopi wa EMLR akanaba umuyobozi w’inama y’ikirenga y’itorero Méthodiste Libre ku, Samuel Kayinamura umurongo yahaye iri torero ubafasha Kwibuka no kuremera abarokotse mu buryo bunoze.

Ntibaziyaremye François yagarutse ku barundi babiciye ababo biyise impunzi nyuma y’urupfu rwa Perezida Ndadaye

Umunyamabanga Nshingwabikorwa w’Umurenge wa Kamembe, Ingabire Joyeux na we yunamira inzirakarengane z’Abatutsi zishyinguye mu rwibutso rwa Kamembe

Surintendant wa Conference ya Kinyaga, Rèv.past. Hakizimana Felicien n’umugore we bunamira Abatutsi 1015 bashyinguye mu rwibutso rwa Kamembe

@Rebero.rw

About The Author