Urwego rw’Igihugu rw’Ubugenzacyaha (RIB) kuri uyu wa Kane tariki ya 13 Kanama 2026 rwerekanye abantu 17 bakekwaho ibyaha bitandukanye, barimo Prof. Emile Bienvenu, Umuyobozi Mukuru w’Ikigo cy’Igihugu gishinzwe Ubuziranenge bw’Imiti n’Ibiribwa, Rwanda FDA.
Aba bantu 17 bose ni abakozi ba Leta. Muri bo, 10 bakorera Rwanda FDA, mu gihe abandi bakorera mu zindi nzego za Leta.
RIB yaberekanye mu rwego rwo gutangariza rubanda abantu bafashwe muri uru rwego rw’iperereza, mu gihe iperereza ku byaha bakekwaho rikomeje.
Prof. Emile Bienvenu, usanzwe ayobora Rwanda FDA, ari mu bantu bakomeye bagaragaye muri iri tsinda ry’abakekwa.
Dr Bienvenu wari wagizwe Umuyobozi mushya wa ‘Rwanda FDA’, afite impamyabushobozi y’icyiciro cya gatatu cya Kaminuza (Master’s), yakuye muri Kaminuza ya Western Cape muri Afurika y’epfo.
Afite kandi impamyabushobozi y’ikirenga mu bijyanye n’ubuvuzi ‘PhD’ yakuye muri Kaminuza ya Gothenburg yo muri Suwede. Abaye Umuyobozi wa ‘Rwanda FDA’ yarabanje gukora Indi mirimo itandukanye mu Rwanda no hanze yarwo.
Yabaye Umwalimu muri Kaminuza y’u Rwanda, ashinzwe amasomo n’ubushakashatsi. Dr Bienvenu kandi, nk’ umushakashatsi yakoranye na Minisiteri y’Ubuzima mu gushyiraho inyandiko y’ibipimo n’amabwiriza ngenderwaho mu buvuzi n’imiti. Yabaye kandi Umukozi w’Ikigo cy’Igihugu cyita ku Buzima (RBC), guhera mu 2011 kugeza mu 2013.
Dr Bienvenu yanakoze muri Kaminuza y’ubuvuzi ya Muhimbili (Muhimbili University of Health & Allied Sciences) yo muri Tanzania, mu 2016.
Abaye Umuyobozi wa ‘Rwanda FDA’ mu gihe u Rwanda rurimo gushaka kwinjira mu byo gutangira gahunda yo gukora imiti n’inkingo.
Kwemezwa nk’Umuyobozi wa FDA, byahuriranye n’ uko Ikigo cy’Igihugu cy’ Iterambere (RDB) cyasobanuriye Inama y’Abaminisitiri ibijyanye n’amasezerano y’ubufatanye n’Ikigo cyitwa International Finance Corporation (IFC), ku byerekeye gushinga uruganda rukora inkingo mu Rwanda.
Rwanda FDA ni ikigo gifite inshingano zikomeye zirimo kugenzura ubuziranenge, umutekano n’imikoreshereze y’imiti, ibiribwa n’ibindi bicuruzwa bigengwa n’amategeko.
Kuba abantu 10 muri aba 17 bakorera Rwanda FDA byatumye uru rubanza rukurura cyane amatsiko, cyane ko iki kigo gifite uruhare rukomeye mu kurinda ubuzima bw’abaturage.
RIB yatangaje ko aberekanywe bakomeje gukorwaho iperereza kugira ngo hamenyekane ukuri ku byaha bakekwaho, mu gihe amategeko agena ko umuntu wese ukurikiranwe afatwa nk’utari umwere kugeza igihe urukiko rubihamije burundu.
Iperereza rizakomeza kugira ngo hakusanywe ibimenyetso bihagije, abakekwa bagezwe imbere y’ubutabera mu gihe haba hari impamvu n’ibimenyetso bibashinja ibyaha.
@Rebero.rw
About The Author
