Ishyirahamwe ry’Umupira w’Amaguru ku Isi (FIFA) rikomeje kwamaganwa n’abatandukanye mu mupira w’amaguru nyuma yo gutangaza umugambi wo kwegurira abashoramari bigenga 20% by’ibikorwa byaryo by’ubucuruzi, mu rwego rwo gushaka amafaranga yo gutegura amarushanwa akomeye arimo Igikombe cy’Isi n’ibindi bikorwa.
Uyu mugambi watumye bamwe mu bayobozi bakomeye mu mupira w’amaguru bagaragaza impungenge bavuga ko ushobora gushyira inyungu z’abashoramari imbere y’inyungu z’umukino.
Minisitiri w’Intebe w’u Bwongereza, Andy Burnham
Mu banenze iki cyemezo harimo Andy Burnham, umwe mu banyapolitiki bakomeye mu Bwongereza, wavuze ko umupira w’amaguru utagomba gufatwa nk’igicuruzwa cyo kugurishwa ku bashoramari.
Ishyirahamwe ry’Umupira w’Amaguru ku Mugabane w’u Burayi (UEFA) na ryo ryagaragaje impungenge, rivuga ko uyu mugambi ushobora guhindura imiyoborere y’umupira w’amaguru ku Isi no gushyira inyungu z’ubucuruzi imbere y’indangagaciro z’uyu mukino.
Aleksander Čeferin umuyobozi wa UEFA
Abasesenguzi bavuga ko FIFA ishaka gushaka andi masoko y’amafaranga mu gihe ibikorwa byayo bikomeje kwaguka, harimo kongera umubare w’amakipe yitabira Igikombe cy’Isi no gutegura amarushanwa mashya asaba ingengo y’imari nini.
Nubwo FIFA itaragira icyo itangaza ku byo inengwa, impaka kuri uyu mugambi zikomeje gukaza umurego, aho benshi bibaza niba kugurisha igice cy’ubucuruzi bwayo bitazagira ingaruka ku bwigenge no ku miyoborere y’umupira w’amaguru ku rwego mpuzamahanga.
@Rebero.rw
About The Author
