Abaturage bo mu mudugudu wa Ntora mu Karere ka Gasabo mu Murenge wa Gisozi mu Kagari ka Ruhango bitabiriye gusangira umuganura
Abaturage bo mu Mudugudu wa Ntora, Akagari ka Ruhango, Umurenge wa Gisozi mu Karere ka Gasabo, kuri uyu wa 7 Kanama 2026 bifatanyije n’Abanyarwanda bose kwizihiza Umunsi Mukuru w’Umuganura, basangira umusaruro ndetse banaganuza abatabashije kweza.
Umuganura ni umunsi mukuru ngarukamwaka uhabwa agaciro mu Rwanda hose, ukizihizwa kuva ku rwego rw’Igihugu kugeza mu miryango y’Abanyarwanda. Muri uyu mwaka, ibirori byo ku rwego rw’Igihugu byabereye mu Karere ka Rusizi mu Ntara y’Iburengerazuba.
Ku rwego rw’Umudugudu wa Ntora, abaturage babyukiye muri ibi birori bizihiza umuco nyarwanda, bagamije gusabana no gukomeza kwimakaza indangagaciro ziranga Umuganura zirimo ubumwe, ubwiyunge, ubupfura, ubudaheranwa, gukunda Igihugu no gukunda umurimo.
Umukuru w’Umudugudu wa Ntora, Anicet Karemera, yashimiye abaturage bitabiriye ku bwinshi ndetse anabashimira ubufatanye bagaragaza mu bikorwa by’iterambere ry’umudugudu.
Yagize ati: “Abaturage bose batumiwe bo mu Mudugudu wacu wa Ntora, tukaba tugiye gusangirira hamwe. Yaba utarabashije kweza ndetse n’uwejeje turabisangirira hamwe kuri iyi site yacu. Ntabwo dushobora guheza abaje batugana. Bivuze ko n’iyo waba uturutse mu wundi mudugudu, uhawe ikaze rwose.”
Yavuze ko Umuganura ushimangira umuco wo gusangira no gufashanya, aho abafite umusaruro basangira n’abatabashije kweza kugira ngo bose bishimire umunsi mukuru.
Karemera yanagarutse ku nsanganyamatsiko y’Umuganura wa 2026 igira iti: “Umuganura, isoko y’ubumwe n’ishingiro ryo kwigira.” Avuga ko abaturage b’Umudugudu wa Ntora bayigize umurongo ubayobora mu bikorwa byabo bya buri munsi.
Ati: “Turimo kwimakaza umuco wo kwigira mu mudugudu wacu twikorera ibikorwa remezo, ntidutegereje amaboko y’abandi ngo aduture ahantu heza kandi hasukuye.”
Insanganyamatsiko y’uyu mwaka irashishikariza Abanyarwanda gukomeza kunga ubumwe, gukorera hamwe, gukunda umurimo no kuwunoza kugira ngo igihugu gikomeze urugendo rwo kwigira rushingiye ku mbaraga z’abagituye.
Mu birori byabereye mu Mudugudu wa Ntora, abaturage bagaragaje ko Umuganura ukomeje kuba umwanya mwiza wo gushimangira ubufatanye, gusangira umusaruro no guha agaciro umuco nyarwanda nk’umusingi w’iterambere rirambye.
Abaturage bo muri Ntora bakurikirana imbyino zateguwe kuri uyu munsi
Akanyamuneza kari kose kubitabiriye uyu muganura nubwo tutabashije gufatira bose icyarimwe
Perezida wa Njyanama y’Umudugudu nawe yagize icyo abwira abaturage ba Ntora
@Rebero.rw
About The Author
