Imirimo yo kubaka inzira yagenewe abakora siporo yo kwiruka no kugenda n’amaguru ku i Rebero mu Mujyi wa Kigali iragenda neza, aho ibikorwa bitandukanye byo gutegura iki gikorwa remezo bikomeje.
Mu gusura aho imirimo iri kubera, hagaragaye ibikorwa byo gutegura ahazashyirwa tapis izajya ikoreshwa n’abakora siporo, ndetse n’ibindi bikorwa birimo kubaka inzira z’amazi n’imikingo.
Iyi nzira izaba ifasha abaturage kubona ahantu heza kandi hateguwe neza ho gukorera siporo, by’umwihariko kwiruka no kugenda n’amaguru.
Abakurikiranira hafi imirimo bavuga ko isigaje igihe gito kugira ngo iki gikorwa remezo cyuzure kandi gitangire gufasha abaturage mu kongera umuco wo gukora siporo.
Kubaka ahantu hateguwe ho gukorera siporo ni kimwe mu bikorwa bigamije guteza imbere imibereho myiza y’abaturage, kuko gukora siporo kenshi bifasha umubiri gukomera ndetse bikagira uruhare mu gukumira indwara zitandura.
Abaturage bakomeje gusabwa gukoresha ibikorwa remezo by’imyidagaduro na siporo bizashyirwa hafi yabo, mu rwego rwo kugira ubuzima bwiza no kugabanya ibyago byo kwibasirwa n’indwara zitandura.
@Rebero.rw
About The Author
