Ishyirahamwe ry’umupira w’amaguru w’abafite ubumuga bwo gutakaza ingingo mu Rwanda (RAFA) ryatangaje gahunda y’imikino izabera hirya no hino mu gihugu igamije gukangurira Abanyarwanda bose kwitabira ibikorwa bigamije kwimakaza ihuriro n’uburenganzira bw’abantu bafite ubumuga, ndetse no gutegura Umunsi Mpuzamahanga w’Abafite Ubumuga (IDPD) uzizihizwa ku itariki ya 3 Ukuboza 2025.
Uyu mwaka, IDPD izizihizwa ku nsanganyamatsiko igira iti: “Kubaka sosiyete irimo bose kugira ngo abafite ubumuga bagire uruhare mu iterambere rusange.” Ibikorwa by’uyu munsi bizabera mu Karere ka Nyabihu, Intara y’Iburengerazuba, hibandwa ku guteza imbere ihuriro ry’abafite ubumuga mu bice by’icyaro.
Imibare y’abafite ubumuga mu Rwanda yerekana ko hakenewe ingamba zihamye
Nk’uko imibare y’ibarura rusange ry’abaturage rya 2022 ibigaragaza, mu Rwanda habarurwa abantu 391,775 bafite imyaka itanu kuzamura bafite ubumuga, bingana na 3.4% by’abaturage bose. Ubu bumuga bugaragara cyane mu bice by’icyaro (3.7%) kurusha mu mijyi (2.8%). Ubumuga bwo kutabona neza (1.4%) n’ubwo kugenda bigoranye (1.1%) nibyo bikunze kugaragara cyane.
Nubwo hari intambwe imaze guterwa, haracyari abantu benshi batariyandikisha cyangwa batagerwaho n’ibikorwa by’ingenzi bibafasha, birimo uburezi, ubuvuzi, ibikoresho bibafasha, n’ubufasha bw’imibereho.
Mu kugaragaza iki kibazo, Umunyamabanga Nshingwabikorwa w’Inama y’Igihugu y’Abafite Ubumuga (NCPD) aherutse kuvuga ati: “Niba ubona umuntu akambakamba kandi akwiye kuba afite igare ry’abafite ubumuga, ni uburangare.”
Mu rwego rwo gushyira mu bikorwa politiki z’ubumwe n’ihuriro, Leta y’u Rwanda izatanga amagare 372 n’ibindi bikoresho bifasha abafite ubumuga, birimo n’ibikoresho bigenewe abanyeshuri 272.
RAFA ikoresha siporo mu kurwanya ivangura no kwimakaza ihuriro
Binyuze muri iyi gahunda nshya y’ubukangurambaga, RAFA iri gukoresha umupira w’amaguru w’abafite ubumuga nk’uburyo bwo kugaragaza ubushobozi bwabo, kurwanya ivangura, no gutangiza ibiganiro ku burenganzira bw’abafite ubumuga mu muryango nyarwanda.
Iyi mikino izabera mu turere dutandukanye tw’igihugu kugeza ku munsi nyirizina wa IDPD 2025. Intego ni ukwerekana impano n’ubushobozi bw’abakinnyi bafite ubumuga, ndetse no gushishikariza imiryango, ibigo, n’inzego z’ibanze gushyigikira siporo ihuza bose n’ibikorwa bigamije korohereza abafite ubumuga.
Perezida wa RAFA, Audace RUGWIRO, yagize ati: “Mugihe twitegura IDPD 2025, dushaka ko buri Munyarwanda amenya imbaraga n’ubushobozi bw’abakinnyi bacu bafite ubumuga. Iyi mikino ni uburyo bwo kugaragaza ko ihuriro rigomba kubaho mu buzima bwa buri munsi. Turasaba abafatanyabikorwa bose kudufasha kugira ngo nta muntu ufite ubumuga usigaye inyuma.”
Visi Perezida ushinzwe imiyoborere n’ubukangurambaga, Louis KWIZERA, yongeyeho ati: “Ubukangurambaga si igikorwa cy’umunsi umwe. Imikino yacu izamura ibibazo by’abafite ubumuga, igatuma abaturage babiganiraho no kubihagurukira. Ihuriro nyaryo rishingira ku buryo bwo kugera ku bikorwa, uruhare mu buzima rusange, n’ubuvugizi buhoraho.”
Guhamagarira bose kwimakaza iterambere ririmo bose
Iyi gahunda ya RAFA ijyanye n’imigambi ya Leta, kandi isaba ko hakongerwa imbaraga mu bikorwa bikurikira;
Gushyira imbaraga mu kumenya abafite ubumuga, cyane cyane mu byaro; gutanga ibikoresho bibafasha mu buryo buhoraho kandi bungana; Kubaka amashuri, ibigo nderabuzima n’ibikorwaremezo rusange bibegereye Guteza imbere uburezi burimo bose no gukumira guta ishuri; Gukora ubukangurambaga ku rwego rw’igihugu Gushyigikira uruhare rw’abafite ubumuga mu ifatwa ry’ibyemezo
@Rebero.rw
About The Author
