Madamu Jeannette Kagame, washinze Umuryango Imbuto Foundation, yafunguye ku mugaragaro gahunda ya ‘Imbuto Hubs
Madamu Jeannette Kagame, washinze Umuryango Imbuto Foundation, yafunguye ku mugaragaro gahunda ya ‘Imbuto Hubs’, igamije guteza imbere ubuzima n’imibereho myiza y’abaturage binyuze mu kubegereza serivisi zitandukanye no guteza imbere impano z’urubyiruko.
Iyi gahunda yatangirijwe mu Karere ka Bugesera, mu Murenge wa Nyamata, ahubatswe ikigo kizajya gitanga serivisi zitandukanye zigenewe abanyamuryango b’ingeri zose, zirimo abana, urubyiruko n’abakuru.
Imbuto Hub ni ahantu hahuriza hamwe ibikorwa bifasha abaturage kwiteza imbere, harimo amahugurwa, ubujyanama, ibikorwa by’ubuzima, imyidagaduro n’ibindi bifasha kubaka umuryango ufite imibereho myiza.
Mu bitabiriye ibirori byo gufungura ku mugaragaro ‘Imbuto Hubs’ y’Umuryango imbuto foundation, harimo Ivan Cyomoro Kagame
Kimwe mu byitezweho cyane ni ugutanga urubuga rwihariye ku rubyiruko, rukabona aho rwerekanira impano zarwo, rukaziteza imbere ndetse rukabona amahirwe yo kuzibyaza umusaruro. Biteganyijwe ko muri ibyo bigo hazajya habera ibikorwa by’ubuhanzi, ikoranabuhanga, ubukangurambaga ndetse n’amahugurwa agamije gufasha urubyiruko kwihangira imirimo no kwiteza imbere.
Imbuto Foundation yatangaje ko gahunda ya Imbuto Hubs itazagarukira i Bugesera gusa, ahubwo izagenda ishyirwa mu bikorwa hirya no hino mu gihugu, kugira ngo abaturage benshi barusheho kubona serivisi zibafasha kuzamura imibereho yabo.
Abaturage bo mu Karere ka Bugesera bishimiye iki gikorwa, bavuga ko kigiye kubafasha kubona serivisi hafi yabo no guha urubyiruko amahirwe yo guteza imbere impano, kwagura ubumenyi no kubaka ejo hazaza heza.
Iyi gahunda ije yiyongera ku bindi bikorwa Imbuto Foundation imaze imyaka ikora mu Rwanda, birimo guteza imbere uburezi, ubuzima, kurwanya igwingira, guteza imbere abakobwa n’urubyiruko, no gufasha imiryango kubaho neza.
Biteganyijwe ko uko Imbuto Hubs zizakomeza kubakwa mu turere dutandukanye, zizaba ibigo bifasha abaturage kwigira, guteza imbere impano no kubaka imibereho myiza irambye.
Ni gahunda igamije kubaka ibigo ahantu hatandukanye mu gihugu aho urubyiruko ruzajya rwigishwa imirimo y’imyuga, imikino ngororamubiri n’izindi gahunda zituma urubyiruko rw’u Rwanda rugira ubuzima bwiza.
@Rebero.rw
About The Author
