aho izaba ishaka gukomeza umusaruro mwiza yatangiriyeho itsinda ku kinyuranyo cy’amanota 63.
Morogoro, Tanzania — ESB Kamonyi ihagarariye u Rwanda mu mikino y’Afurika y’Iburasirazuba y’amashuri, FEASSA 2026, yatangiye neza nyuma yo gutsinda URU Community yo muri Tanzania ku manota 96-33.
Uyu mukino wa Basketball wabereye ku kibuga cya Highland Estate i Morogoro, ukurikiranwa n’abahagarariye Minisiteri ya Siporo, Minisiteri y’Uburezi ndetse n’Ishyirahamwe Nyarwanda ry’Imikino n’Umuco mu Mashuri (FRSS).
ESB Kamonyi yagaragaje imbaraga kuva umukino utangiye, ikomeza kugenzura umukino no kubona amanota menshi, mu gihe URU Community yo muri Tanzania yananiwe gukurikira umuvuduko w’ikipe ihagarariye u Rwanda.
Ku musozo w’umukino, ESB Kamonyi yari imaze kugira ikinyuranyo kinini cy’amanota, itsinda URU Community 96-33.
Iyi ntsinzi iha ESB Kamonyi intangiriro nziza mu mikino ya FEASSA 2026, ndetse ikongera icyizere cy’uko ishobora gukomeza kwitwara neza muri iri rushanwa rihuza amashuri yo mu bihugu byo mu Karere ka Afurika y’Iburasirazuba.
Abahagarariye inzego z’u Rwanda bakurikiranye uyu mukino, bagaragaje ko iri rushanwa ari umwanya ukomeye wo guteza imbere impano z’abanyeshuri muri siporo, ndetse no kubafasha guhura na bagenzi babo bo mu bindi bihugu.
FEASSA ni rimwe mu marushanwa akomeye ahuza amashuri yo mu Karere ka Afurika y’Iburasirazuba, aho abanyeshuri bahatana mu mikino itandukanye, bakanasangira ubunararibonye mu rwego rwa siporo n’uburezi.
ESB Kamonyi ikomeje imyiteguro yo gukina indi mikino y’iri rushanwa, aho izaba ishaka gukomeza umusaruro mwiza yatangiriyeho itsinda ku kinyuranyo cy’amanota 63.
@Rebero.rw
About The Author
