Ibura ry’amazi mu bice bitandukanye by’Umujyi wa Kigali rikomeje guteza impungenge abaturage, bamwe bakavuga ko bamaze igihe batabona amazi meza, bigatuma bahitamo gushaka andi mu migende kugira ngo babone ayo gukoresha mu buzima bwa buri munsi.
Aba baturage bavuga ko ikibazo cy’amazi kibagiraho ingaruka zikomeye, cyane cyane ku miryango itishoboye, kuko iyo babonye amazi acuruzwa n’abanyonzi bayagura ku giciro kiri hejuru.
Umwe mu baturage avuga ko ijerekani imwe y’amazi igurwa amafaranga 1,500, igiciro avuga ko kiri hejuru ugereranyije n’ubushobozi bw’imiryango myinshi.
Agira ati: “Iyo tubonye amazi ku banyonzi, ijerekani imwe tuyishyura amafaranga 1,500. Ni amafaranga menshi cyane, kandi ntabwo buri muryango ushobora kuyabona buri munsi.”
Kuvoma mu migende nubwo amazi atizewe
Kubera ikibazo cyo kubura amazi, bamwe mu baturage bahisemo kujya bavoma amazi mu migende. Gusa na bo ubwabo bemera ko ayo mazi adakwiriye gukoreshwa nk’amazi meza, kubera umwanda n’impumuro mbi bafite.
Bamwe mu bayavoma bavuga ko aya mazi anuka nk’urubobi, bigatuma batinya ko ashobora kubagiraho ingaruka ku buzima. Abandi bo bavuga ko bakeka ko hari amazi aturuka mu bwiherero bw’abantu ashobora kuba yinjira muri iyi migende.
Ibi bituma abaturage bagaragaza impungenge z’uko gukoresha aya mazi bishobora guteza indwara, cyane cyane iziterwa n’amazi mabi n’umwanda.
Nubwo bazi ko amazi bavoma mu migende adafite ubuziranenge, bavuga ko kubura andi mahitamo bibahatira kuyakoresha mu mirimo yo mu rugo.
Barasaba WASAC gukemura ikibazo
Abaturage basaba Urwego rushinzwe gutanga amazi n’isuku, WASAC, kugira icyo rukora kuri iki kibazo, bakabona amazi meza kandi ahendutse.
Bavuga ko kuba bahatirwa kugura ijerekani y’amazi ku mafaranga 1,500 cyangwa kujya kuvoma mu migende bigaragaza uburemere bw’ikibazo, bityo ko hakenewe igisubizo kirambye.
Agira ati: “Turifuza ko WASAC yatugoboka, tukabona amazi meza hafi y’aho dutuye. Ntabwo bikwiye ko umuturage ahitamo hagati yo kugura amazi ahenze no gukoresha amazi mabi ashobora kumuteza indwara.”
Abaturage kandi basaba ko hakorwa ubuvugizi ku miryango itarabona amazi meza, kugira ngo ibikorwa remezo by’amazi byongerwe kandi amazi agere ku baturage bose.
Iki kibazo cy’ibura ry’amazi kije mu gihe amazi meza, isuku n’isukura ari serivisi z’ingenzi mu kurinda ubuzima bw’abaturage. Abaturage bavuga ko bakeneye igisubizo kirambye, aho guhora bashaka amazi ahandi cyangwa bakayahendwa n’abayazanye.
Kugeza ubu, abaturage baracyategereje igisubizo ku kibazo cy’ibura ry’amazi, mu gihe bamwe bakomeje gukoresha amazi yo mu migende nubwo ubwabo bavuga ko badashira amakenga ku bwiza bwayo.
@Rebero.rw
About The Author
