Abanyarwanda kuri uyu wa 7 Kanama 2026 bizihije Umuganura, umunsi mukuru ngarukamwaka uhabwa agaciro mu gihugu hose kuva ku rwego rw’Igihugu kugeza mu miryango y’Abanyarwanda.
Muri uyu mwaka, ibirori byo ku rwego rw’Igihugu byabereye mu Karere ka Rusizi mu Ntara y’Iburengerazuba, aho abaturage n’abayobozi bahuriye mu kwizihiza uyu munsi ushimangira ubumwe, ubudaheranwa no gukunda umurimo.
Umuganura ni umwanya wo kwifatanya n’Abanyarwanda bose mu gusigasira indangagaciro z’umuco nyarwanda zirimo ubumwe, ubwiyunge, ubupfura, ubudaheranwa, gukunda Igihugu no gukunda umurimo, ari na zo zifatwa nk’inkingi y’iterambere rirambye.
Mu butumwa yatanze muri ibi birori, Minisitiri w’Ubumwe bw’Abanyarwanda n’Inshingano Mboneragihugu, Dr Jean Damascène Bizimana, yagarutse ku kamaro ko kubungabunga indangagaciro zaranze Abanyarwanda no kuzikomoraho imbaraga zo guhangana n’ibibazo byugarije sosiyete y’iki gihe.
Yifashishije imigani ya Kinyarwanda, yagize ati: “Uwakwimye amata aba akwigisha kwihahira.” Yasobanuye ko uyu mugani usobanura ko umuntu akwiriye gushyira imbere umurimo no kwigira aho gutegereza gufashwa n’abandi.
Yanagize ati: “Intwari nyayo iboneka ku rugamba,” asobanura ko iterambere n’intsinzi bishingira ku murava, kwitanga no gukunda igihugu.
Dr Bizimana yavuze ko ubuvandimwe n’ubusabane ari zimwe mu ndangagaciro zigaragarira mu Muganura, aho Abanyarwanda basangira umusaruro, bagafashanya kandi bagashimangira ubumwe bwabo.
Yashimangiye ko indangagaciro z’umuco zigomba gufasha Abanyarwanda kunesha ibyonnyi birimo ibiyobyabwenge, ubusinzi n’indi myitwarire yangiza urubyiruko n’imiryango.
Yibukije ko mu muco nyarwanda hari ibikorwa byafatwaga nka kirazira, bityo asaba ko n’ubu abaturage bakwiye kwirinda ibiyobyabwenge n’inzoga z’inkorano zangiza ubuzima.
Ati: “Mwibaze aho bise inzoga ngo ‘Dundubwonko’.” Yavuze ko n’amazina yazo agaragaza ingaruka zikomeye zigira ku buzima bw’abazinywa.
Minisitiri Dr Bizimana yasobanuye ko Umuganura utari uwo gusangira ibisarurwa gusa, ahubwo ko ari umwanya wo kuzirikana indangagaciro zatumye uwo musaruro uboneka.
Yagize ati: “Mu Muganura ntabwo hasangirwa ibyejejwe gusa, ahubwo hasangirwa ibikorwa byagezweho binyuze mu gukorera hamwe, kwitanga no gushyira imbere indangagaciro.”
Insanganyamatsiko y’Umuganura wa 2026 igira iti: “Umuganura, isoko y’ubumwe n’ishingiro ryo kwigira.” Iyi nsanganyamatsiko ishishikariza Abanyarwanda gukomeza gushyira hamwe, gukunda umurimo no kwigira, bakubaka igihugu gishingiye ku ndangagaciro z’umuco nyarwanda.
Kwizihiza Umuganura wa 2026 bishingiye ku ntego zirimo gukomeza gushimangira ubumwe n’ubudaheranwa bw’Abanyarwanda, kubashishikariza gufashanya no gukorera hamwe, kwimakaza umuco wo gukunda umurimo no kwigira, ndetse no guha agaciro indangagaciro z’umuco nk’ishingiro ry’iterambere ry’u Rwanda.
@Rebero.rw
About The Author
