Mu minsi ishize, hari amakuru akomeje kugarukwaho mu itangazamakuru no ku mbugankoranyambaga avuga ku mikoranire itavugwaho rumwe hagati ya bamwe mu rubyiruko rwo mu Mujyi wa Kigali n’ishyaka DALFA-Umurinzi ritaremerwa gukorera mu Rwanda. Muri ayo makuru, izina rya Isingizwe Wivine Munezero wo mu Karere ka Kicukiro rikunze kugarukwaho nk’umwe mu rubyiruko rushinjwa kugira uruhare mu gushishikariza abandi kwinjira muri iri shyaka riyobowe na Victoire Ingabire Umuhoza.
Amakuru aturuka impande zitandukanye avuga ko hari ibikorwa bivugwa nk’amanama akorwa mu buryo bw’ibanga, bigamije kuganiriza no gukangurira urubyiruko kwifatanya n’ibitekerezo bya politiki bitanyuze mu nzira zemewe n’amategeko y’igihugu. Gusa, kugeza ubu, izi mvugo ntizirahamwa n’itangazo ryemewe ry’inzego z’umutekano cyangwa ubutabera bw’u Rwanda.
Isingizwe Wivine ushishikariza bamwe mu rubyiruko kwiyunga ku ishyaka DALFA-Umurinzi
Victoire Ingabire Umuhoza, washinze ishyaka DALFA-Umurinzi mu 2019, azwi nk’umwe mu banyapolitiki batavuga rumwe n’ubutegetsi buriho. Mu ngamba ze za politiki, akunze kwifashisha imbugankoranyambaga n’urubyiruko, cyane cyane ruba mu gihugu no muri Diaspora, mu gukwirakwiza ibitekerezo bye, nubwo ishyaka rye ritaremerwa gukorera mu Rwanda.
Ku rundi ruhande, ubuyobozi bw’u Rwanda bukomeje gushimangira ko urubyiruko ari inkingi ikomeye y’iterambere n’imiyoborere myiza. Perezida Paul Kagame yakunze kugaragaza ko igihugu cyubakiye ku rubyiruko rufite icyerekezo, ariko anasaba abakiri bato kwitandukanya n’abantu cyangwa imitwe ishobora kubashora mu bikorwa binyuranyije n’amategeko, bigamije inyungu za politiki z’abantu ku giti cyabo.
Mu bihe byashize, ifatwa n’ihanwa ry’abantu bagize uruhare mu bikorwa by’ubugizi bwa nabi birimo n’ibyafitanye isano n’imitwe irwanya Leta y’u Rwanda, byabaye isomo rikomeye ku bakeka ko bashobora guhungira kure y’amategeko. Ibyo byerekanye ko u Rwanda rukurikirana kandi rukageza imbere y’ubutabera uwakoze ibyaha bikomeye, aho yaba aherereye hose.
Aya mateka agaragaza ko inzira yo kurwanya Leta binyuze mu bikorwa bihungabanya umutekano w’igihugu itagira aho iganisha, uretse ku gihombo n’ingaruka zikomeye ku bayigiyemo. Ni yo mpamvu ubuyobozi bw’igihugu bukomeza gushishikariza Abanyarwanda, by’umwihariko urubyiruko, gukoresha imbaraga zabo mu kubaka igihugu, aho kuzishyira mu migambi ishobora gusenya ejo hazaza habo.
Mu rwego rwo kongera kubaka u Rwanda nyuma ya Jenoside yakorewe Abatutsi mu 1994, igihugu cyafashe ibyemezo bikomeye bigamije kunga Abanyarwanda no kubaka ubumwe. Hari aho abakoze ibyaha bemeye kwicuza no gusaba imbabazi, bakababarirwa, bagasubizwa mu buzima busanzwe, hagamijwe ubwiyunge n’amahoro arambye.
Ibi byose bigaragaza ko politiki y’u Rwanda ishingiye ku mutekano, ubumwe n’iterambere rirambye, aho urubyiruko rusabwa kugira uruhare rufatika, rwirinda gukoreshwa mu migambi ya politiki ishobora kurusubiza inyuma no kuruhutaza ejo hazaza.
@Byiringiro Elysee
About The Author
