Leta ya Pakistan yasabye Leta Zunze Ubumwe za Amerika na Iran kubahiriza amasezerano yo guhagarika imirwano no gukoresha inzira za dipolomasi mu gukemura amakimbirane, nyuma y’uko umwuka mubi wongeye kuzamuka hagati y’impande zombi.
Mu itangazo ryashyizwe ahagaragara na Minisiteri y’Ububanyi n’Amahanga ya Pakistan,nkuko byatangajwe n’umuvugizi wa Minisiteri y’Ububanyi n’Amahanga, Tahir Andrabi, icyo gihugu cyagaragaje impungenge z’uko kongera kubura kw’imirwano bishobora guhungabanya umutekano w’akarere ndetse bikagira ingaruka ku bukungu n’ubuzima bw’abaturage.
Pakistan yavuze ko yubaha ubusugire bw’ibihugu byose kandi isaba impande zose kwirinda ibikorwa byatuma amakimbirane arushaho gukomera. Yanashimangiye ko ibiganiro bya dipolomasi ari byo nzira irambye yo kugera ku mahoro n’umutekano.
Abasesenguzi bavuga ko Pakistan ifite inyungu mu gukomeza umutekano mu karere kubera umubano wayo n’ibihugu bitandukanye byo mu Burasirazuba bwo Hagati ndetse n’ingaruka amakimbirane ashobora kugira ku bucuruzi mpuzamahanga no ku isoko ry’ingufu.
Mu gihe amahanga akomeje gukurikirana uko ibintu bihagaze, Umuryango w’Abibumbye n’ibindi bihugu bikomeye ku isi na byo bikomeje gusaba impande zirebwa n’iki kibazo kwifata no gushyira imbere ibiganiro aho gukoresha ingufu za gisirikare.
Pakistan yasabye ko hashyirwaho uburyo bwafasha kongera icyizere hagati y’impande zishyamiranye no kwagura umwanya wa dipolomasi, hagamijwe gukumira ko amakimbirane yakwira mu karere kose.
Abakurikirana politiki mpuzamahanga bavuga ko kubahiriza amasezerano yo guhagarika imirwano no gukomeza ibiganiro bishobora gutanga amahirwe yo kugabanya umwuka mubi no gushaka umuti urambye ku bibazo biri hagati ya Amerika na Iran.
Iyi gahunda yo gushimangira dipolomasi irimo gushyigikirwa n’ibihugu byinshi bibona ko amahoro n’umutekano byagerwaho neza binyuze mu biganiro no kubahana hagati y’ibihugu birebwa n’aya makimbirane.
@Rebero.rw
About The Author
